إذا المراجل لبسة شمـاغ وعقـال
قـل للعـذارى يلبسـنّ العمايـم
ما عاد يفرق زول حرمه ورجـال
دام الفعايل تشبـه البعـض دايـم
المرجله ما هيـب كلمـه وتنقـال
وتروح ما راحت هبـوب النسايـم
وإلا خشونة صوت أو رفع الأثقال
أو رزة صـدور وفعـل الـزلايـم
ولا هي بعد مفتاح موتر وجـوال
وإلا ردى لسانـن حديثـه شتايـم
المرجله شيمه عن القيـل والقـال
رفيع نفس (ن ) حر بالجو حايـم
المرجله عقلٍ وزن وزنـه جبـال
ودون العقل وش فرقنا والبهايـم
يا مسندي لو مايل الوقت بي مـال
يا ولد أبويه يـا عظيـم العزايـم
يا معرب الجدين من العم والخـال
يا نخوة المفزوع وقـت الهزايـم
المرجله يا خوي هي طولة البـال
هي العزم هـي الصبـر فالظلايـم
فيها الكـرم عـزه دلـه وفنجـال
فيها الكرامه عن ردى الطبع شايم
والدين لامنه خذا القلـب منـزال
مشى طريق الحق وابليـس نايـم
ومن لا عرف ربه في طيب الحـال
لابد وقت الضيـق بالهـم هايـم
حتى صلاتك مع جماعات ورجـال
في خيرها يا خوي نعـم الغنايـم
ولامن نصف ليلك قم صفي البـال
يا عظم أجرك بين ساجـد وقايـم
ولا من رفع ربي له كل الأعمـال
حسن الذكر لا قالو فـلان صايـم
وخلك شريف القصد يا طيب الفال
سوء المقاصد فالبيـوت الهدايـم
واحذر تبيع النفس في درب الأنـذال
وتتبع خوي إبليـس راع النمايـم
النفس خيل لـك إذا كنـت خيّـال
ومن لا قوى نفسه قوته الهزايـم
ولا صرت ما تدري ليش أنت رجال
والله خسارة فيـك ذبـح التمايـم
الرئيسية 
البوابة 
الجمعة يوليو 31, 2009 8:22 pm
